Saturday, January 23, 2016

ප්‍රේමයක් නොතිබුණා නොව

බමර තුඩගින් පෑරි පෑරී
රිදෙන විට සියපත් පෙතී
වතින් ගිලිහෙන කඳුලු බිඳු
යහනත වැදී මුකුලිත වෙවී
හෙමි හෙමින් වැලපෙනා මකරඳ
නුරාවෙන් මුව විට පිරී
නැගෙන සුසුමන් නෙතඟ ‍රැඳුනා
ලිහෙන සඳ විකසිත පෙතී

හදවතත් සියොලඟත් දැවුණින්
සරාගී සුසුමන් වැදී
මුවග වන් සියුමැලි වු ඉකියක්
සවන් ළඟ නො‍රැඳී ‍රැඳී
පියුම් පෙති මුලු ලොවට රහසෙන්
තැලී පොඩි වී යත සිඳී
මදහසක් පමණකිය දු‍ටුවේ
නුඹේ මුව මතුවෙහි බැඳී

සඳත් අමවක ඇවිත් ගිය දා
නුඹ නො ආවත් රුව මැවී
සිතත් , මුළු හදවතත් හිනැහුණි
සෙනෙහසක මතකය ඇඳී
පරව ගිය මුත් නුඹෙ දෙපා ළඟ 
සහස් වර මඳ හස සිඳී
ප්‍රේමයක් නොතිබුණා නොව, නුඹ
පෙම් කළා අදහමි බැඳී

9 comments:

  1. මේ කොටස හරිම ලස්සනයි

    //සඳත් අමවක ඇවිත් ගිය දා
    නුඹ නො ආවත් රුව මැවී
    සිතත් , මුළු හදවතත් හිනැහුණි
    සෙනෙහසක මතකය ඇඳී//

    ReplyDelete
    Replies
    1. මමත් ආසයි ඒ කොටසට

      Delete
  2. මතකයන් ළග නොමියෙනා සිත
    තවම ඇහුවත් යළි යළී..
    දුරක් ගොස් බව වටහ ගනු මැන
    නැවත නොඑමිය හැරි යළී...

    පස්ටයි කවිය..
    ජයවේවා

    ReplyDelete
    Replies
    1. නැවත් නාවත් හිතේ කහටක්
      නොමැති බව කියනෙමි යළී
      සෙනෙහෙ බිඳුවක් සිතේ පතුළෙම
      රැඳී ඇත අදහමි බැඳී

      ස්තූතියි මහේශ්

      Delete
  3. සඳත් අමවක ඇවිත් ගිය දා
    නුඹ නො ආවත් රුව මැවී
    සිතත් , මුළු හදවතත් හිනැහුණි
    සෙනෙහසක මතකය ඇඳී
    පරව ගිය මුත් නුඹෙ දෙපා ළඟ
    සහස් වර මඳ හස සිඳී
    ප්‍රේමයක් නොතිබුණා නොව, නුඹ
    පෙම් කළා අදහමි බැඳී...// මේ වගේ කතාව. හරිම ලස්සනයි. ජයවේවා..!!!

    ReplyDelete
    Replies
    1. මුලු කවියෙම අර්ථය වෙනස් වෙන ඒ කොටසට මම ගොඩක් කැමතියි. මොන තරම් දේ වුණත්, අන්තිමේදි අත ඇරලා දාලා ගියත්, අපි කොහොමද කියන්නෙ, හිතේ බැඳීමක් මුලදි නොතිබුණා කියල

      Delete
  4. කාලෙකින් අක්කගේ කවියක්.
    ලස්සනයි..

    ReplyDelete